Муус устар 28 күнүгэр Саха сиригэр култуура сылын чэрчитинэн уонна Саха Өрөспүүбүлүкэтин күнүнэн Чэриктэй нэһилиэгин норуот маастардарын, иистэнньэннэрин, мас уонна тимир уустарын, оҕолор үлэлэрин уус-уран оҥоһуктарын быыстапката турда. Маннык быыстапка туруута норуоппут айымньытын билиһиннэрии, уустар үлэлэрин харыстааһын уонна кэнчээри ыччакка билиһиннэрэр, сырдатар сыаллаах ыытылынна. Нэһилиэкпит икки норуот маастарын Рожина Мария Николаевна уонна Горохова Александра Николаевна туостан тигиллибит араас оҥоһуктара сырдатылыннылар. Ону таһынан нэһилиэк маастардара Горохова Розалия Тимофеевна кыбытык тигии уонна тимиринэн, оҕуруонан тигиллибит кычымнара, ротанг материалынан оҥоһуллубут сундууга, Горохова Агафья Николаевна кылынан-сиэлинэн, оҕуруонан тиһиллибит дьахтар симэхтэрэ, түүнэн оҥоһуллубут(валяние) суумкалара, Горохов Александр Дмитриевич тимиринэн уһааран оҥорбут быһахтара, Горохов Евгений Васильевич талах олоппосторо быыстапканы киэргэттилэр, Румянцева Интерна Васильевна кыргыттара Марианна аныгылыы кэһиэччиктээх сахалыы халадаай ырбаахыны уонна оҕуруонан кыыс оҕо симэхтэрэ, Саина кылынан оҥоһуллубут сапсыыкалара кэрэхсэннилэр. Федоров Владимир Михайлович оскуола оҕолорун үлэлэрин быыстапкаҕа туруорда. Бу быыстапкаҕа кыттыбыт дьоммутугар, оҕолорго нэһилиэкпит култуурунай, духуобунай сайдыытыгар бэйэҕит билиигитин уонна айар дьоҕургутун көрдөрбүккүтүгэр, сырдаппыккытыгар улахан махталбытын тиэрдэбит. Кыттыбыт дьон туоһу сурук уонна бэлэх тутан бардылар. Бүтэһигэр оскуола оҕолоругар сахалыы остуол оонньуутунан түмүктэннэ.
